top of page
الخصية المعلقة
عند الأطفال وحديثي الولادة
الخصية المعلقة هي أحد العيوب الخلقيه إلي بيتولد بيها نسبه كبيره من الأطفال , ونقدر نوصف الخصية المعلقة بكل بساطه علي إنها خصيه وقفت في مرحله من مراحل نزولها من تجويف بطن الطفل إلي كيس الصفن .
قبل ما اتكلم في اي حاجه تخص الخصيه المعلقه وأنواعها و اي هي طرق علاجها , لازم نعرف الأول ....
رحلة الخصية دي أو مسارها من تجويف البطن إلي كيس الصفن .
كيس الصفن دا هو الكيس اللي بيبقي موجود تحت العضو الذكري عند الأطفال .
أولا كدا الخصيه بتتكون والطفل لسا في رحم الأم, وبتبقي موجوده في بطن الطفل, تقريبا ورا كِلية الطفل, وقبل الولاده بفترة بسيطه جداً بتبدأ تنزل إلي كيس الصفن, عن طريق حاجه إسمها القناه الإربيه ( ودي حاجه شبه الأنبوبه كدا بتبقي موجوده في المنطقة الإربية بتنزل عن طريقها الخصيه إلي كيس الصفن )
القناه الإربيه دي بيبقي ليها فتحتين :
فتحه علويه, ودي أول فتحه بتوصل ليها الخصيه وهي نازله من البطن
وفتحه تانيه سفليه بتنزل منها الخصية إلي كيس الصفن.
كدا إحنا فهمنا وعرفنا رحله الخصيه من البطن إلي كيس الصفن ... صح كدا ؟
علشان كدا هنلاقي إن الخصيه المعلقه مش بتقف او بتبقي موجوده غير في مكانين إتنين بس ...
طب إي هما؟؟
1- بتبقي موجوده في تجويف البطن زي ما هي .
2- أو تنزل إلي القناه الإربيه وتقف .
علشان كدا الخصيه المعلقه إتقسمت إلي نوعين وهما :
الخصيه المحسوسه :
ودي بتبقي نزلت من تجويف البطن إلي القناه الإربيه من الفتحه العلويه بتاعتها , وفضلت موجوده داخل القناه الإربيه
الخصيه الغير محسوسه :
ودي بتبقي موجوده في تجويف البطن زي ما هي ومنزلتش أصلا إلي القناه الإربيه
الخصية المعلقة عند الأطفال والرضع مع الد...
-
هل الخصيه لو كانت غير محسوسه يبقي دا معناه إنها موجوده بنسبه 100% في تجويف البطن ؟لأ طبعا لأن ممكن تكون الخصية متخلقتش أصلا .
-
أمتي بنكتشف الخصيه المعلقه أو أمتي نعرف إن الطفل مصاب بالخصيه المعلقه ؟دا بيحصل بعد الولاده مباشرة علشان كدا من المهم جداً جداً ضرورة فحص الطفل بعد الولاده مباشرة عند دكتور متخصص في جراحه الأطفال وحديثي الولاده , علشان نقدر نحدد أي هي العيوب الخلقيه المصاب بيها الطفل ونقدر نلحقها بدري قبل ما تتطور وفي أسرع وقت ممكن .
-
طيب جالنا بيبي حديث الولادة وأكتشفنا أن عنده خصية معلقه إلي اللي بيحصل أو بيتم مع الطفل دا ؟أولا بنبدأ نطمن الأم ونشرح ليها ونفهمها أي هي الخصيه المعلقه وأي النوع المصاب بيه الطفل ونطلب من الأم أنها تاخد الطفل وترجع تاني للدكتور بعد 6 شهور سواء كان الطفل مصاب بخصيه محسوسه أو غير محسوسه .
-
هل ينفع نعمل عملية الخصية المعلقة لحديثي الولادة قبل ما يتم البيبي 6 شهور ؟لا طبعاً , لأن معظم الأطفال ممكن الخصيه بتاعتهم تنزل إلي كيس الصفن طبيعي من غير اي تدخل جراحي بعد الفتره دي وطبعا دي فرصه كويسه جداً لأن الطفل مش هيحتاج اي عمليه .
-
طيب اي اللي بيحصل لما البيبي يبقي عنده 6 شهور ؟الدكتور بيبدأ يفحص الطفل مرة تانية ويتأكد هل الخصيه محسوسه ولا غير محسوسه ؟؟ ولو الخصية طلعت محسوسة بيبدأ الدكتور يجهز الطفل لعملية جراحيه بسيطه جداً ودقيقة ( اسمها عمليه تسليك وتنزيل وتثبيت الخصيه في كيس الصفن ) وبتتم عن طريق إن الدكتور بيفتح فتحه بسيطه جدا في المنطقه الإربيه فوق في أعلي الفخد كدا ويبدأ يعمل عمليه تسليك للخصية علشان الخصيه تنزل لكيس الصفن ( اللي هو مكانها الطبيعي ) وبيعمل ليها محفظه ( مكان يثبتها فيه ) في كيس الصفن , ويثبتها ف الكيس . بس كدا
-
طيب لو الخصيه طلعت غير محسوسه يبقي اي العمل ؟أولا الطفل لازم يدخل حاجه أسمها منظار استكشافي ( ودا جهاز بيبقي عباره عن كاميرا صغيره بتدخل بطن الطفل عن طريق السره بنتأكد منها هل الخصيه موجوده ولا لا ) طيب طلعت الخصيه مش موجوده في البطن ... في الحاله دي الدكتور بيبلغ أهل الطفل إن الطفل دا هيعيش بخصية واحده بس وإن الخصيه التانيه مش موجوده ومش هيحتاج اي عمليات .
-
ولو الخصيه كانت موجوده في تجويف البطن اي اللي بيحصل ؟بنبدأ نعمل عملية مكونة من مرحلتين : المرحله الأولي : هي أن الدكتور بيبدأ في عملية تطويل الخصية عن طريق المنظار . المرحلة الثانية : وهي عملية تنزيل وتسليك الخصية , وتثبيتها في كيس الصفن عن طريق المنظار من خلال فتحه فوق المنطقة الإربيه .
-
هل السونار أو الرنين أو اي فحوصات تانية ليها لزمة أو مفيده في موضوع الخصيه ؟الحقيقه أن كل الأشعات والفحوصات دي ملهاش اي قيمه لأن السونار بنعمله علشان نشوف حجم الخصيه بس لكن مش بيفيد في مكان الخصيه أو طريقة العمليه لأن دا بيحصل عن طريق فحص الدكتور نفسه للطفل.
-
طيب لو الخصيه اصلا غير محسوسه ؟الدكتور في الحاله دي مش بيعترف بأشعه السونار أصلا لأنها بتبقي غير دقيقه . طيب أعمل رنين؟ برضو لأ طبعا لأنها ذياده تكلفه علي الفاضي لأن الطفل كدا كدا هيدخل منظار إستكشافي يعني أصبح السونار والرنين ملهمش اي فايدة.
-
هل ي دكتور ينفع نستني علي العمليه بعد فتره ال 6 شهور ؟لا طبعاً , ماينفعش نستني أكثر من 6 شهور , لأن 6 شهور فترة كافيه لنزول الخصية بدون أى تدخل جراحي , لكن لو الخصية مانزلتش خلال ال 6 شهور فالخصية مش هتنزل لوحدها , لازم تدخل جراحي , لأن الخصية كدا لو استنينا عليها ممكن يحصلها ضمور وحجمها يقل , ودا بيأثر علي خصوبة الطفل في المستقبل , لأن أكيد طفل عنده خصيه واحده غير طفل عنده خصيتين...علشان كدا من الأحسن طبعا أن بعد فترة ال 6 شهور لاًزم تتم العملية.
-
أي الخصية النطاطيه دي ؟ وهل ليها أي ضرر ؟الخصية النطاطه هي الخصية اللي ممكن تلاقيها موجوده في مكانها في كيس الصفن بطريقه مريحه جداً وممكن بعدها بفتره تطلع للقناه الإربيه ودا بيحصل نتيجة السقعه أو أن الطفل جسمه يكون مش دافي ودي خصية ملهاش اي ضرر خالص إلا في بعض الحالات النادره جداً ممكن عند سن 9 او 10 سنين يتعمل ليهم عملية تثبيت للخصية .
-
واى موضوع الخصية القصيره ؟دي خصية بتبقي موجوده في أخر المنطقة الإربيه , ولما تيجي تحاول تنزلها لكيس الصفن تنزل معاك بصعوبة أو بالشد , لكن أول ما تسيبها ترجع تاني علطول للقناه الإربيه ودي بتتعامل معامله الخصيه المعلقه وبتحتاج عملية .
bottom of page